‫#‏وجـهـة_نـظـر‬ [5]
‫#‏الشخصيات_الأوڨر‬..!!

* الطبيعي إننا لازم نقابل ناس كتير بشخصيات وطباع مختلفه , وطبيعي بردو إنك تقابل شخصيات مأڨوره ودا فِ حد ذاته عقاب وتكفير ذنوب كمان !

* فِ نوع مستفز دايماً يحسسك إنه فاهم كل حاجه وكتاب معلومات مُتحرك ، دا نفس الشخص اللي بينطق الإنجلش غلط ولما تصححله يقولك ياعم اسكت انت فاهم حاجه , هو بردو اللي لو وقفته ف الشارع عشان تسأله ع عنوان يقولك انت ايه االي جابك هنا ! وبعدها يتحول لخريطه ويبدأ يوصفلك وصف هيروغليفي من نوعيه ادخل شمال وسيب اول 15 شارع وارجع لورا تاني عشان تدخل الشارع التلاتاشر هتلاقي محل ملابس داخليه اسألي علي سعر بوكسر القطونيل وصل كام !

* فِ نكديه بأڨوره ودي حالها يصعب علي محمد محي نفسه , لو كلمتها تحسسك انها لقيطه واهلها لاقوها قدام باب جامع وبيعيروها واكتشفت ان حبيبها اخوها ف الرضاعه وابوها متاخد اسير من حرب 73 ، ميزه النوعيه دي لما تكتئب بتاخد جنب لوحدها, بس اللي يحرق الدم إنك لو سألتها عن سبب اكتئبها بيطلع انها من حوالي 10 سنين كدا المستر م عملهاش نجمه لما جابت 10/10 ف الاملاء !

* الشاب الأوڨر فِ مشاعره بيكون واخد امتياز مع مرتبه المحن .. ده لو كلمته كلمه يرد عليك بقصيده ل احمد شوقي ، كلامه من نوعيه " لا تجعل سهام الحب تشق قلبك كي لا ينجرح " ، سهام دي تبقي امك ، سوري ف الكلمه, معلش انا مش اسمنت الممتاز عشان اتحمل ضغط السنين ده ، ميصحش كدا إرحم مرارتي

* بعيداً عن اڨوره الطباع فِ بردو افوره مكتسبه زي البنت اللي امها اتوحمت عليها ف بويا ودقيق , تلاقيها ملغوصه وشها ميك آب وشبه لوحه الرسم ، لو عطست هتعمل Colour Day وهي نفس البنت اللي بتعمل ديكور ف شقتها وتخلي لون الحيطه احمر

* ف نوع أوڨر بزياده لما بيكتئب يقضيها قهوه ساده وسجاير عشان الدنيا مبقاش ليها طعم , وتلاقيه كاتب علي الفيس انفاسي بدأت تختنق من الحياه ، وفين احتواء الاب لابنه, كل ده عشان ابوك زود اخوك 5 جنيه عنك !