‫#‏وجـهـة_نـظـر‬ [11]
‫#‏قاعه_الأفراح‬ ..!!

عامة قاعه الفرح معروف من اسمها فرح يعني فرحه يعني ننبسط ونهني بعض دا الطبيعي لكن اللي مش طبيعي انك تتكلم ع ميك آب العروسه اللي مش لايق عليها واهل العريس البيئه والبدله الإيجار والقاعه اللي مش من مقام سعادتك !! حبيبي أبوك و أمك اتجوزو علي السطوح

عادي جداً يا انسه ان فستان العروسه م يعجبكيش دي أذواق لكن هو عاجبها هي ومخليها طايره من الفرحه ف متحشريش مناخيرك ف اللي مالكيش فيه يابايره

أم العروسه ابوس ايدك بلاش تبصي من تحت لفوق لأهل العريس والله هما ولاد ناس بس وقت البوفيه حضرتك عارفه انه بالنسبالهم زي اليوم الفري بتاع الرچيم

رجاء من العريس والعروسه بلاش تورته ف الفرح انتو كل واحد بيأكل التاني حته بطرف الشوكه وتتصورو والموضوع بسيط بالنسبالكو !! لكن المنظر دا بيخلي البنت السنجل تاكل ضوافرها بالمانكير , رجاء اخر من العروسين اتفقو مع مدير القاعه يقفل الحمامات عشان انا قرفت من ام السيلفي بتاع الحمام

بصي يابنت الناس جميع كائنات الكوكب بتدخل الحمام ودا الطبيعي ف بعد أذن معاليكي تقولي انا رايحه الحمام لكن م تقوليش رايحه اظبط الميك آب ! مكسوفه انك هتدخلي الحمام تعملي زي الناس ومش مكسوفه لما بتقولي كوكو ونحم !

جيران صحاب ولاد عم خاله ابو ام العروسه انت جاي ليه ؟ بصلي وانا بكلمك جاي ليه !! جاي تبوظ منظر الفرح انت و ولادك السبعتاشر !! طب جيت واللي كان كان افرح مع الناس لكن ايه لزمه ام الكيسه السودا اللي بتعبي فيها الأكل !!

البنات اللي بتقف ترقص ب كتفها !! هترقصي زي الناس اتفضلي هتقفي تعملي مكسوفه يبقي تتفضلي تترزعي ف اي حته وسيبي باقي البنات تاخد فرصتها ده موسم تزاوج والرزق يحب الخفيه

صحاب العريس اللي جايبين مسدسات وصواريخ واعلام أؤمرني عاوز ايه ؟ لا بجد مش فاهمك عاوز ايه ! دا فرح ياحبيبي مش ماتش, وانتو بترقصوا العريس بلاش تمرمطو امه شيل وحط وخبط ورزع هتكسرة ضهره وهتضعفوا موقفه, وبلاش الحركات الزباله اللي بتعملوها ارقص وانت ايدك ف جيبك

حوار بوكيه الورد اقسم بالله تخاريف مش معني انك مسكتيه يبقي هتتجوزي وحياه امي م هتشوفي الجواز طول ما القُصه بتاعتك بره الطرحه

بالنسبه للأكسسوار من فضلك وبعد اذنك إلبسي حاجات سمبل ,, مش لازم لما تعدي من جنبي احس ان ف حنطور ماشي ولا بتاع عرق سوس بيشخلل.

#الدكتور